بروفايل مبدع اسمه ( أبو عركي البخيت )

 

بروفايل مبدع 

( عركي ) 

( واحشني ..!! )

وهاهي مدني تعلن عن نفسها من جديد وتدفع بلاعب   ارتكاز  هذه المرة في ملعب الموسيقى والغناء السوداني 

اسمه ( أبو عركي البخيت ) 

فدخل الفتى وقتها  يحمل فقط موهبته العبقرية …

في بحر يتجول فيه الأساطين …..

لم يكن معروفا لدي الكشافين ولم يدر عنه أحد …

لكن الساحر  كان يعرف في قرارة نفسه أنه على موعد مع التاريخ 

دخل عركي  الملعب ولانه عاشق للسودان 

فقد تغنى بعزة في هواك في بداياته وبعض الاغنيات 

حتى نزلت  قوة من ( الكوماندوز  ) وأولاد مدني  منحته الدعم والمساندة 

فقدم له  ( الفخيم ) فضل الله محمد …

( بوعدك ياذاتي يا أقرب قريبة الليله بهديك دبلة الحب والخطوبة ..💍

فقبلت ( عزة  ) أبو عركي البخيت عريسا في مصفوفة الغناءالسوذاني ..🥰

وقد لحنها له الموسيقار محمد الامين  شخصياً 

( شوف ليك لقاء ) 💞

ليقدم الرجل نفسه باسلوب خاص في الغناء حتى لايكرر تجارب من سبقوه   وكان له ما أراد فكان أبو عركي البخيت  نسخة واحده غير قابلة  للنسخ والتقليد ….

وياقلب آنا كنت قايلك تبت من تعب السفر ومن مخاوات القماري ومن شراب موية المطر ….🎼

وقلب عركي لم يتب وواصل رحلته نحو القمر …

وارسل لنا شوقه مرسال فوصلنا مرساله  على جناحي ( يمامة ) 

ووصل عركي نفسه لقلوب المحبين …وتماس الاشواق 

ومرسال الشوق ياالكلك ذوق 

أغشي الحبان في كل مكان

قول ليهم شفنا جبل مَره

وعشنا اللحظات حب ومسرّة

بين غيمة تغازل كل زهرة وخيال رمّانة علي المجرى

فرأينا ( جبل مره ) صورة وصوت هذه المرة فكانت هذه الأغنية هدية المصنف ( كابلي )لعركي  شعراً  ولحن …!!

( شوف ناس كابلي بهدو شنو ) 🌹

  وليتهم شاهدوا ( جبل مره ) بعيون ( كابلي ) وصوت ( عركي ) لتغيرت أشياء كثيرة …ومياه كثيرة مرت تحت الجسر …

وواصل عركي ركوب الألحان والسطوع  وكحال الكبار كان يغني بإحساسه وكيانه الذي يتدفق  وهجاً ويصلنا  حار وشجي ودافق 

وعبر إبن الجزيرة مدني المكان …..وتربع في السودان الكيان …!!

( وروحي مشتهية ودمدني ) ……!!

أبو عركي ممكن يغني مقال في جريدة ونشوفو حلو 

وهو يرسل آهاته المشحونة وزفراته الحرى 

وإحساسه النبيل ….

ياخ حتى مسكتو للمايك مختلفة ……🎤

وكت  يلف ليك السلك دا  كدا في يدو  ويسوق بالتانية  

 ويبدأ في الإقلاع ….!!🛫

ما عندك حل غير نربط الأحزمة ونستعد للطيران 

( لو فكيتو بتطير  إنت ذاتك ) …..!!

وإلا باكر لما ترجع ،

أنا بحكى ليك عن الحصل ،

وعن بعد المسافة وقربها

ولمن يفارق زول عيون

غاليات عليهو كتير خلاص وبحبها

والله أحكام يا قدر

والله أحكام يا مسافة ويااااا سفر

واحشني …..🫶

 ( إنا لله ياخ ) ….!!

انت الواحشنا والله 

اذا لم يكتب التجاني حاج موسى غيرها لأجلسته مع الكبار …وعركي غناها من روحه …!!

والتقي أبو عركي مع شعراء كثر كل بطعمه ومذاقه 

ليقطف من الزهور والنجوم ويقدم  للناس 

الذين عشقهم ( عركي ) ونذر لهم روحه  والغناء  ….

فبادله الناس الوفاء والحب 

فكان فنان الشعب …وقريب الروح 

و( قديس الأغنية السودانية ) كما أسميه أنا 

رقيق وعنيد ومسؤول ومصادم  وحنين وجميل 

والأهم من دا كلو ……فنان مترف 

وإنسان حلو  وسوداني أصيل 

ملامحو وطن ….وغناهو شجن …

عشان كدا معجبنو بقولو لي ( عركينا ) 

و ( أبونا ) 

فأي جمال وعظمة يا رجل ….

 تجملت بزيارته في بيتو اكتر من مره وفي كل مره أجده أجمل وأنبل وأكرم….!! …..وضحاك 

ونور بيتنا برضو …

( وأخاف أسال عليك الناس

وسر الريدة بينا يذيع ….!🎼

أبو عركي البخيت فنان من عالم آخر…المبادئ عنده 

لا تتجزأ والفن بالنسبه له  موقف ورسالة ومشروع 

فحرمنا ذلك من سيل إبداعه لفترات متقطعة وهو يتقاطع مع الأنظمة لكنه موجود في القلوب ….!!

أخبرنا في بداياته عن حبيبته  وحكى لنا عنها وقال 

ضل ضفايرا ملتقانا

شدُّوا أوتار الضلوع أنا بحكي ليكم عن حنانا

مرة غنت عن هوانا …فرّحت كل الحزاني

ومرة لاقت في المدينة الحمامات الحزينة

قامت أدّتا من حنانا 

وعن حبيبتي بقولكم

ياخ نقول ليك قوله ….يمين نحن ذاتنا حبيناها معاك 

وكل عاشق وجد فيها ليلى 😍

وقد كتبها الرقيق سعد الدين ابراهيم ….!!

وساعود اليك يا طائر السعد منفصلا   لأخبر الناس عنك وعن الوسامة …..!!

فسلام  عليك في عليائك …وسلام عليك في العالمين 🙏

وسعد الدين قدم أغنيه أخري لعركي إسمها (

( الحب والحرية ) لم تر النور ….

لكننا رأينا الحب وتعثرت الحرية ولو إلى حين …!! 

( أبو عركي البخيت ) أيقونة سودانية في الزمن الصعب ورمزية باذخة  في وقت التعب ….

يغني من روحه  …ويضيف من كيانه ….ويخرج من كنانته 

لذلك عبرت أغنياته ( الكباري المغلقة ) وتسللت مع النيل 

ووصلت كامله البهاء  تثري مكامن الروح …

أبو عركي فنان جاد وملتزم ورقيق لكنه لا ينهزم ……

بغني لي أي حاجه بديها طعم ….مصحوب بثقافة موسيقية عالية تجعل موسيقاه  تواشيح يستظل بها عشاق الفن 

الأصيل …..

ياخ حتى ضحكتو  غير 

وتضحك الدنيا وتطير

تصحي الكهارب في الشوارع 

وتندثر صور الموانع

ضحكك شرح رغم الزمان

نور سحاب كل الفضا🎼

والله انت النورتنا يا عركي وأبهرتنا وحسستنا  أن لدينا فنانين كبار نباهي بهم ونفخر …..!!

مشينا مع عركي في كل الدروب  وتهنا مع أغنياته العميقة  …!!

( سحنا ) في رحاب الوطن و( قبلنا ) في ضل الحبيبة 

وسهرنا الليل وكملنا في ظلال عينيكي النعسانة

 أضاف من سحره في موسيقاه المترفة 🎼 والتي يحركها كيفما ما شاء تتريث أحيانا وتمشي الهويني في أحايين اخر  وتسرع خطاها تارة  وترقص مرات ….

وحلوه عيونك فيهم روعه …. فيهم حب بتمثلو دمعه

ولان العواطف لا تتجزأ كان عركي وفيا لأسرته 

ورفيقة دربه الأستاذة ( عفاف الصادق حمد التيل ) 

عليها رحمة الله  بكل سطوعها هي الأخرى ..

ووراء كل عظيم ( ملهمة  ) 

فقد كانت له سند ومدد وجوار 

وعندما رحلت تبعثر الرجل واهتزت دواخله الندية 

فقد فقد صنو حياة …وملاذ قلب  …ورفيقة روح 💔 

وآه يازمن …

  تاريك لابد لي بي شيتاً  كتر .مازمان انا وانت لفينا المواني 

بالقطارات والمطارات والسفن 😥

وبقلب الفنان واحتساب المؤمن تماسك عركي وبقيت روحها ترفرف إلى جواره تدعمه من جديد ….

ومن بعيد هذه المره 

ومن معزتك إنتي ليا ..ختيتي قلبك فوق إيديا 

وقلتي ليهو عزيز عليا.. عليكا الله أحرسو  ليا

وقلتي ليهو قدر عنيا..،،عليكا الله أحرسو ليا

وفي صباحو وفي عشيا….

وقلتي ليا معاك سلامة..✋

وقد كان وفيا لهذا القلب الرقيق ….!!

وقد حرسه ياعفاف …!!💕

فطوبى لك …والمجد لعركي 

عندما يغني للوطن  قلبك بدق …💓وعندما يغني للرمن نبضك بدق ….!!! 

وعندما يغني للحبيبه …لاتعرف تدخل ….لا تعرف تمرق …😍

رفي عينيك دنيا غريبة،،

دنيا ملانة محنة و طيبة،

اطال الله في عمره فهو أحد الركائز المهمة التي 

تتكئ عليها الأغنية السودانية في هذا الزمن الصعب 

وهو احد الكبار الذين ننظر اليهم  بمحبة وإكبار 

ونظهر لهم كثير من الود والاعتزاز والتقدير …!

اتمنى نراه يعتلي المسارح  في وطن يشبهه 

ويعود  لنا من جديد ( عركينا ) الذي نحب ….!

ويغني لينا  غنوة العيد والفرح الليلة يوم ميلاد فرحنا

�وكل أسوار المداين زينوها بقوس قزح�نغمة الحرية تصدح

الليلة يوم ميلاد فرحنا 💥

بنغني ياخ إنت بس تعال  ….!! وهذا الوطن سيأتي لامحال 

وإلا باكر لما ترجع ،

أنا بحكى ليك عن الحصل ،…!!